quote

,,En var það myndin sem fyrsti ráðherrann okkar, Hannes Hafstein, sá, þegar hann leit í barm þjóðar sinnar - í upphafi seinustu aldar? Sá hann land sem hýsti þjóð, heillum horfna, með framtíð sem gæti ekki orðið annað en spegilmynd fátækrar fortíðar? Nei öðru nær. Þó var Hannes enginn sveimhugi og því síður nokkur skýjaglópur. Hann sá vissulega erfiðleikana. Hvernig gat hann annað? Þeir blöstu við, hvar sem litið var, svo hrikalegir, að það var hvorki hægt að bægja þeim frá sér, né heldur að mikla þá fyrir sér. En hann vissi að þjóðin átti aðeins eitt svar við erfiðleikum. Það var að yfirvinna þá".

Svo mælti Davíð.

Nú er nóg komið!

Íslenska þjóðin hefur risið upp á afturlappirnar, sýnir í sér tennurnar og gerir sig reiðubúna til að koma benzínfjelögunum á hvínandi kúpuna. Er hætt að kaupa sms skyr, pulsur og kit kat í Select og öðrum sambærilegum sjoppum. Kaupir þar BARA BENZÍN. Engin grill, enga diska með Pöpum og ekkert tóbak. BARA BENZÍN.

Í kjölfar nýútgefinnar skýrslu Samkeppnisstofnunar, sem er þykkari en Biblían, hefur íslenska þjóðin tekið þá ákvörðun að láta ekki olíufjelögin hafa af sér fleiri krónur en nauðsynlegt er, líkt og þau hafa nú viðurkennt að hafa gert svo árum skiptir. Það er nú orðið opinbert að olíufurstarnir íslensku lögðu á ráðin og ákváðu í sameiningu hvað benzínið skyldi kosta og tryggðu þannig að á því myndu allir græða. Nema íslenska þjóðin, sem eins og áður sagði hefur risið upp á afturlappirnar og ætlar að hefna sín. BARA BENZÍN.

En hvar ætlar íslenska þjóðin nú að verzla sitt skyr? Sumir hverjir munu eflaust skunda glaðir í bragði í Bónus - verðöryggi frá upphafi - ekkert bruðl. Hugsandi: ,,Af mér verður ei framar stolið, BARA BENZÍN". Koma svo heim og sletta skyrinu, af því þeir eiga það. Setjast niður og horfa á viðtal við borgarstjórann í Íslandi í dag á Stöð 2. Þangað til að þeir fá sms skilaboð um tvo fyrir einn tilboð í Smárabíói á nýjustu myndinni hans Balta í gegnum gsm símana sína sem eru skráðir hjá OgVodafone.