Sveimhugi

- í versta falli skárra -

Thursday, June 01, 2006

Um bakara, smið og aftökur

,,They are flying now straight from Akureyri to Kaufenhagen", sagði ungi maðurinn með Hertz derhúfuna við túristann um leið og hann afhenti bíllyklana þegar sá síðarnefndi spurði hvers vegna flugstöðin á Akureyri væri hálflokuð og læst. Það er ekki ofsögum sagt að vanagangur flugvallarins hafi hikstað eitthvað við þessa stórmerku atburði. Beint flug til Köben frá Ak. 10 tollarar og læst hurð. AEY International. Íha.

Fyrst var mér sagt að sækja farangurinn úti, sunnan við hús. Svo vestan við það. Loks komu þeir keyrandi á litlu flugvallarbílunum með töskurnar okkar, snillinganna að sunnan og konunnar sem sat við hliðina á mér sem kaus Vinstri græna. Ég þurfti að hringja í Hertz til að finna gaurinn með lyklana að bílnum sem var annars ágætur, nýleg Toyota með skut.

Ég var með bílinn í 2 daga. Fór til Húsavíkur og á Laugar. Vinnuferð sem ekki verður rakin hér. Í dag var hringt í mig frá Hertz og síðar í dag fékk ég þennan póst:

,,>>> xxx 1. June 2006 16:00 >>>
Sæll Þórður Sigurðsson

Herna eru nokkrar myndir af brunagötunum.
Þessar myndir benda til þess að áberandi bruni er á sætum."

(xxx bætt við í staðin fyrir raunveruleg nöfn þar sem bannað var að birta tölvupósta nema með leyfi viðkomandi þangað til í dag (sjá mál Jónínu Ben gegn 365), tek samt ekki séns)

Ég hefði betur tekið myndir af brunagötunum í sætunum (sem ég er næstum því viss um að voru þar) áður en ég lagði í hann. Síðan hvenær er bannað að reykja í bílaleigubílum? Allavega. Hertz vill meina að brunagötin séu eftir mig, sem reykti tvisvar í bílnum. 60 þúsund kall kostar nýtt áklæði. Ég er í afneitun. Kaupi mér karton og kveikjara seinna í kvöld og keyri niðrá Hertz planið. Keðjureyki svo eins og ég eigi lífið að leysa og tala við sjálfan mig á meðan ég kveiki í næsta blysi með því sem enn logar.